Үөһээ Бүлүү Кэнтик нэһилиэгэр 2022с. муус устар 5 күнүгэр “ЧАП УУС” өрөспүүбүлүкэтээҕи Төрүт удьуор уустар күрэхтэрэ буолан ааста. Бу күрэх тимир уустар төрүт үгэстэрин, ньымаларын сөргүтэр, тимири уһаарар идэлэрин култуурунай сыаннас быһыытынан тилиннэрэр, саҥа хайысхалары көрдөөһүн быһыытынан быйыл 5-с төгүлүн ыытыллар.
Уустар күрэхтэригэр күөн көрсө Сахабыт сирин 8 улууһуттан, ол иһигэр Мэҥэ Хаҥаластан, Намтан, Хаҥаластан, Кэбээйиттэн, Сунтаартан, Ньурбаттан, ыаллыы Бүлүү улууһуттан уонна Үөһээ Бүлүүттэн барыта 62 тимир ууһа кэлэн кыттыыны ылла. Тэрээһин саҕаланыытыгар уустар уран оҥоһуктарын быыстапката, атыы-эргиэн буолла.
Саха Өрөспүүбүлүкэтин Ил Дархана Айсен Николаев 50тыһ., улуус баһылыга Владимир Поскачин 40тыһ., Кэнтик нэһилиэгин баһылыга Валерий Николаев 30тыһ. солк. уу харчынан туруорбут бириистээх “БАСТЫҤ АННЬЫЫ” күрэҕэр 40 анньыыһыт илин-кэлин түһүстэ.
Бу күрэххэ Далыр нэһилиэгин 55 саастаах Дмитрий Васильевич Михалев кыттан “САХА АННЬЫЫТЫГАР” 1-кы миэстэни ылан улуус баһылыга Владимир Семенович Поскачин 40тыһ. уу харчынан туруорбут бирииһин ылан үөрүү-көтүү өрөгөйүн биллэ.
Дмитрий Михалев кэпсиир: “Мин бу күрэх буоларын муус устар 4 күнүгэр куйаар ситимин нөҥүө билбитим уонна Далыр олохтооҕо, кырдьаҕас суоппар Акимов Василий Васильевич көҕүлээһининэн бу күрэххэ кыттан көрөргө санаммытым. Бииргэ төрөөбүт убайым Валерий Васильевич түүнү быһа анньыыбын оҥорон, уһааран сарсыарданан бүтэрэн биэрбитэ. Сарсыардаттан анньыыбын ылан Кэнтик нэһилиэгэр суоппар Василий Васильевич Акимов сөбүлэһэн айаҥҥа туруммуппут. Кэнтиккэ тиийэн Далыртан төрүттээх бииргэ үөрэммит атаспар Васильев Анатолий Васильевичка анньыым угун оҥостубутум, дьэ, итинник эмискэ “БАСТЫҤ АННЬЫЫ” күрэҕэр кытта тиийбитим. Күрэххэ кыттааччылар олус элбэх этибит. Тэрээһин олус үчүгэй, 8 араас улуустан дьон бөҕө кэлбит этэ. Күрэхтэһии олус тэрээһиннээхтик ааспыта, тыҥааһыннаах киирсиилэр буолбуттара. Ол түмүгэр “САХА АННЬЫЫТЫГАР” 1-кы миэстэни ылан улуус баһылыга Владимир Семенович Поскачин 40тыһ. уу харчынан туруорбут бирииһин ылан үөрүү үрдук өрөгөйүн биллим. Мин Саха оҕото буоларбынан оскуола сааспыттан анньыынан тутта үөрэммитим. Күһүн аайы Муҥхаҕа анньыыбын туппутунан сылдьарым, билигин да муҥханы көтүппэккэ сылдьабын. Анньыы хайдах тимиртэн оҥоһуллубутуттан, ыйааһыныттан, биилээһиниттэн улахан тутулуктаах буолар. Анньыынан анньарга кистэлэҥим суох, учугэйдик сөпкө тыыныахха эрэ наада. Эдэр дьоҥҥо сүбэлиэм этэ Өбүгэ төрүт дьарыгын бырахпакка илдьэ сылдьыаххайыҥ уонна туох да мэһэйтэн туран, хаалан хаалбакка көхтөөх буолуоххайыҥ. Саха дьоно буоларбыт быһыытынан уу таһаардахпытына аһыыбыт уонна ынах-сүөһүбүтүн иитэбит. Түмүкпэр көҕүлээччибэр, суоппарбар Акимов Василий Васильевичка, убайбар Михалев Валерий Васильевичка, бииргэ үөрэммит биир дойдулаахпар Васильев Анатолий Васильевичка улахан махталбын тиэрдэбин. Элбэх киһи түмүлүннэҕинэ ситиһии тахсар онон өрүү маннык тумсуулээх, ситиһиилээх буолуоххайын!” – диэн түмүктүүр Дмитрий Михалев.
Онон Үөһээ Бүлүү Кэнтик нэһилиэгэр “ЧАП УУС” өрөспүүбүлүкэтээҕи Төрүт удьуор уустар күрэхтэригэр Далыр нэһилиэгин олохтооҕо Дмитрий Михалев “САХА АННЬЫЫТЫГАР” 1-кы миэстэни ылан улуус баһылыга Владимир Семенович Поскачин 40тыһ. уу харчынан туруорбут бирииһин ылан үөрүү өрөгөйүн илдьэ кэллэ. Дмитрий Васильевич эдэрдии эрчимнээх күүстээх санааҕынан күрэххэ кыттыбыккытыгар, нэһилиэк аатын бүтүн өрөспүүбүлүкэҕэ ааттаппыкытыгар барҕа махталбытын тиэрдэбит! Өрүүтүн итинник көхтөөх, эдэрдии эрчимнээх, күүстээх санаалаах буоларгытыгар баҕарабыт!
08.04.2022
