Муус устар 9-10 күнүгэр Горнай улууһун Бэрдьигэстээх нэһилиэгэр Республиканскай “Буулдьанан ытыы” чемпионата буолан ааста.
Бу күрэххэ Үөһээ Бүлүү улууһуттан 7 киһиттэн турар хамаанда кытынна. Ол иһигэр Далыр нэһилиэгиттэн бэстилиэтинэн ытыыга Анатолий Васильевич Акимов уонна Раиса Никитична Семенова баран кыттан кэллилэр.
Чемпионат кыттыылааҕа Анатолий Васильевич:
“Горнай улууһун Бэрдьигэстээх нэһилиэгэр Республиканскай саҥа ТИР (олимпийскай резерва филиала) арыллыытыгар “Буулдьанан ытыы” чемпионата буолла. ТИР икки этээстээх, үөһээ этээс оҕунан ытыы, аллараа этээс бинтиэпкэнэн уонна бэстилиэтинэн ытарга аналлаахтар. ТИР олус үчүгэй, киэҥ-куоҥ аныгылыы тутуулаах, биэс уон оҕоҕо аналлаах интернаттаах. Ил Дархан Айсен Сергеевич Николаев уонна спорт миниистирэ Леонид Николаевич Спиридонов кэлэ сылдьыбыттара. Оҕунан ытыыга олимпиада призера Степанида Артахинова баар этэ.
Биһиги Үөһээ Бүлүү улууһуттан 7 буолан кыттан кэллибит, ол иһигэр 2 дьахтар, 2 эр киһи бэстилиэтинэн ытыыга, 1 дьахтар, 2 эр киһи бинтиэпкэнэн ытыыга. Биһиги нэһилиэктэн икки буолан кытынныбыт, доруобуйаларынан хааччахтаах дьоҥҥо Раиса Никитична аны сайын Бороҕоҥҥо ыытыллыахтаах норуоттар икки ардыларынааҕы спартакиадаҕа путевка ылла уонна норуоттар икки ардыларынааҕы спартакиадаҕа кыттар чиэскэ тигистэ. Күрэххэ кыттааччы олус элбэх, бинтиэпкэнэн ытыыга 100-чэкэ киһи, бэстилиэтинэн ытыыга 60-тан тахсалыы киһи кытынна. Мин улуус хамаандатыгар киирбитим 10 сыл буолла, араас улуустарынан, куораттарынан, тас дойдуларынан кыттабыт”. Түгэнинэн туһанан, биһигини күрэххэ көҕүлээн илдьэ сылдьыбыт дьоммутугар махтанабыт уонна үлэлэригэр, тус олохторугар ситиһиини баҕарабыт!
Анатолий Васильевич уонна Раиса Никитична эдэрдии эрчимнээх, күүстээх санаалаах бүтүн республиканскай күрэххэ кыттыбыккытыгар, нэһилиэк аатын бүтүн республикаҕа ааттаппыккытыгар барҕа махталбытын тиэрдэбит уонна өрүүтүн итинник көхтөөх, эдэрдии эрчимнээх, күүстээх санаалаах буоларгытыгар баҕарабыт!

14.04.2022сыл