Ыам ыйын 19 күнүгэр, Далыр нэһилиэгин кинигэтин 12, 13 туомнарын ,«Чөрөктүүрэп» саҥа кинигэлэр презентациялара уонна В.И. Ленин аатынан бүтүн Сойуустааҕы Пионерскай тэрилтэ төрүттэммитэ 100 сылын көрсө улахан суолталаах тэрээһиннэр икки чааһынан буолла. Ол курдук, тэрээһин бастакы чааһыгар Далыр нэһилиэгин кинигэтин 12, 13 туомнарын, «Чөрөктүүрэп» саҥа кинигэлэр презентациялара буолла. Кыһыл бартыһаан, сэбиэскэй, партийнай, общественнай үлэһит, суруйааччы Дмитрий Иванович Донской – Чөрөктүүрэп суруйбут «Санаа ситиитэ» биэсэттэн туруорууну көрдүбүт. Биэсэни туруорда Далыр култуура сынньалаҥ киинин уус-уран салайааччыта Варвара Ломпордурова. Кинигэлэр тахсалларыгар өйөөбүт, үбүлээбит «Далыр нэһилиэгэ» муниципальнай тэриллии аатыттан баһылык Георгий Егорович эҕэрдэ, махтал тылларын эттэ. Салгыы Саха Өрөспүүбүлүкэтин үөрэҕириитин үтүөлээх улэһитэ, кыраайы үөрэтээччи, Далыр нэһилиэгин, Үөһээ Бүлүү улууһун бочуоттаах олохтооҕо, Далыр нэһилиэгин кинигэтин 13 туом ааптара Анатолий Софронович Аксаков тыл эттэ уонна өссө даҕаны 14, 15 туом кинигэлэрин таһаартараары бэлэмнии сылдьарын туһунан сырдатта. «Чөрөктүүрэп» кинигэ ааптара Валерий Васильевич Васильев кинигэ презентациятыгар куйаар ситимин нөҥүө видео-ыҥырыынан кыттыста.
Онтон салгыы, тэрээһиммит 2-с чааһыгар В.И. Ленин аатынан бүтүн Сойуустааҕы Пионерскай тэрилтэ төрүттэммитэ 100 сылын көрсө олус үчүгэй өрө көтөҕүллүүлээх, долгутуулаах тэрээһин буолла. Ол курдук, тэрээһин эҕэрдэ тыллартан саҕаланна. «Далыр нэһилиэгэ» муниципальнай тэриллии баһылыга Георгий Егорович эҕэрдэ тылын эттэ уонна Пионер баһаатайдарга, «Артек», «Орленок», «Океан» лааҕырдарга сылдьан кэлбит Пионердары чиэстээн эҕэрдэ сурук уонна Саха өрөспүүбүлүкэтин ыччат хамсааһынын бэтэрээннэрин сэбиэтин аатыттан үбүлүөйдээх бэлиэни, удостоверениены үөрүүлээх быһыыга-майгыга ыҥырыылаах ыалдьыттарга туттартаата. Салгыы ыҥырыылаах ыалдьыттар, дьиҥнээх пионердар, бэйэлэрин пионерскай олохторун туһунан сырдаттылар, ахтан-санаан аастылар, андаҕар тылларын эттилэр, гимн ыллаатылар уонна урукку кэми санаан араас тургутуктары, оонньуулары оонньоотулар. Араас кэмнэргэ “Далыр оскуолатыгар пионер баһаатайдарынан үлэлээбиттэр” уонна “Пионерия олоҕуттан…” презентация көрдүбүт. “К борьбе за дело Коммунистической партии Советского Союза будьте готовы!”.

• “Всегда готовы!” – диэн дьоро киэһэбитин түмүктээтибит.
  Үүнэр көлүөнэ аатыттан холобур оҥостор дьоммутун В.И. Ленин аатынан бүтүн Сойуустааҕы Пионерскай тэрилтэ төрүттэммитэ 100 үбүлүөйдээх сылынан өссө төгүл эҕэрдэлиибит!