Далыр нэһилиэгин олохтоох библиотекатыгар, ахсынньы 6 күнүгэр, күнүс 3 чаастан Саха АССР үтүөлээх бырааһа, Саха АССР культуратын уонна искусствотын үтүөлээх диэйэтэлэ Останин Владимир Петрович төрөөбүтэ 90 сылыгар аналлаах “Останин быраас” диэн кинигэ сүрэхтэниитэ буолан ааста. Кинигэ сүрэхтэниитин кинигэни хомуйан оҥорбут Саха республикатын үөрэҕириитин туйгуна, К.С. Чиряев, М.Т. Егоров аатынан бириэмийэлэр стипендиаттара, Ороһутааҕы К.С. Чиряев аатынан норуот педагогикатын түмэлин мэтэдииһэ, герой ийэ, элбэх сиэн эбэтэ Валентина Захаровна Осипова ыытта.

Кинигэҕэ, олох эдэр сааһыгар 1965 сыллаахха “Саха АССР искусствотын үтүөлээх диэйэтэлэ”, 1968 сыллаахха “Саха АССР үтүөлээх бырааһа” ааттары сүкпүт Останин Владимир Петрович туһунан, 2007 сыллаахха Осипов Владимир Саха сирэ Россия састаабыгар киирбитэ 375 сылыгар анаммыт айар суруйуу күрэҕэр кыттан хомуйбут матырыйаалын сэргэ UlusMedia сетевой таһаарыы SMM-редактора Зинаида Григорьева Останин Владимир Петрович Уус-Дьааҥы улууһугар хайдах үлэлээбитин туһунан хомуйбут матырыйааллара киирбиттэр. Ону таһынан биир дойдулаахтарбыт Уларова Марфа Севастьяновна, Попова Мария Гаврильевна, Дадаскинова Варвара Егоровна ахтыылара киирбиттэр. Кинигэ сүрэхтэниитигэр барыта 28 киһи кыттыыны ылла. Олор истэригэр СӨ доруобуйатын харыстабылын туйгуна, үлэ бэтэрээнэ Дадаскинова Варвара Егоровна, СӨ доруобуйатын харыстабылын туйгуна, үлэ бэтэрээнэ Уларова Марфа Севастьяновна уола Афанасий Владимирович кыттыыны ыллылар. Түмүккэ тургутукка Далыр орто оскуолатын үөрэнээччитэ Акимова Милена элбэх боппуруоска сөптөөх эппиэти биэрэн “Останин быраас” кинигэни ааптартан бэлэх тутта.

Кинигэ ааҕааччы киэҥ араҥатыгар ананар.