Далыр нэһилиэгин олохтоох бибилэтиэкэтигэр суруйааччы, тылбаасчыт, сценарист Алексей Амбросьев – Сиэн Мунду Москваҕа “Эдэр гвардия” кинигэ кыһатыгар “Уһулуччулаах дьон олоҕо” (Жизнь замечательных людей) сиэрийэнэн тахсыбыт “Исидор Барахов” диэн кинигэтин сүрэхтэниитэ буолла. Кинигэ сүрэхтэниитигэр Далыр орто оскуолатын “Далыр кэскилэ биһиги…” оҕо хамсааһынын оҕолоро уонна Далыр муниципальнай тэриллии баһылыгын солбуйааччыта Евдокия Климентьевна Лазарева кыттыыны ыллылар, барыта 12 киһи сырытта. Оҕолор Исиидэр Бараахап олоҕун олус сэҥээрэ, интэриэһиргии иһиттилэр, саҥаны, элбэҕи биллилэр.

Санатан этэр буоллахха, 2023 сыл олунньу 12 күнүгэр Саха норуотун чулуу уола, биир дойдулаахпыт Исидор Никифорович Барахов төрөөбүтэ 125 сылын туолбута. Ол курдук, Исиидэр Бараахап 125 сылын көрсө, Үөһээ Бүлүү улууһугар 2023 сыл Исиидэр Бараахап сылынан биллэриллибитэ.