Бүгүн, о.э. 2023 сыл, кулун тутар 9 күнүгэр биһиги нэһилиэкпитигэр биир улахан сүҥкэҥнээхэй, үөрүүлээх күн буолла.
Биир дойдулаахпыт, ыаллыы Аһыкай нэһилиэгиттэн төрүттээх Далыр оскуолатыгар үөрэнэн сайдыы суолугар үктэммит биэксэл, оҕо көтөҕөөччү идэлээх уонна бу идэтинэн олоҕун устата Далырга 28 сыл үтүө суобастаахтык үлэлээн “Сирдээҕи Аанньал” диэн бар дьонун махталынан ааттаммыт, 12 оҕо күн күбэй ийэтэ Кривогорницына Наталья Васильевна үтүө, сырдык аата үйэ саас Далыр балыыһатыгар иҥэриллэн, Мэҥэ бэлиэ сурук, Наталья Васильевна туруорсуутунан, 1971 сыллаахха акылаата түспүт балыыһатын истиэнэтигэр үйэ саас сааллар күнэ буолла.
Наталья Васильевна Кривогорницына барыларыттан уһулуччу. Кини Далыр сэттэ кылаастаах оскуолатын ситиһиилээхтик үөрэнэн, Дьокуускайдааҕы фельдшерскэй-акушерскай оскуоланы (ЯФАШ) бүтэрэн эмчит идэтин баһылаан Далыр нэһилиэгэр 1946 сылтан, олохтон туоруор диэри олус бэриниилээхтик үлэлээн бар дьон махталын ылбыта. Сүүһүнэн оҕо кини сымнаҕас, сылаас илиитигэр түһэн күн сирин көрбүтэ. Эмчит, киһи быһыытынан ийэ бастыҥ холобурун көрдөрөн, норуокка «Сирдээҕи Аанньал» диэн үрдүк ааты сүкпүтэ. Олоххо күүстээх, активнай туруктаах Наталья Васильевнаны улууска бииргэ үлэлиир коллегалара 1968 сыллаахха Москва куоракка буолбут “Бүтүн сойуустааҕы эмчиттэр 14 сийиэстэригэр” делегатынан талбыттара. Онно сийиэс үрдүк трибунатыттан улууска “Суһал көмө” массыыната наадатын туруорсан тыл эппитэ.
Далыр олохтооҕо Осипова В.З. Үөһээ Бүлүү хаһыакка (2022 сыл алтынньы 7 күнүгэр, 62 нүөмэригэр), Улуус Медиа сайтка (балаҕан ыйын 12 күнүгэр) ыҥырыы таһаарбытыттан сиэттэрэн Наталья Васильевна оҕолоро, ону олус үөрэ уонна долгуйа ааҕан, ийэлэрэ үлэлээбит балыыһатыгар, Ийэ сылыгар сөп түбэһиннэрэн «Кривогорницына Н.В. аатын сүгэр балыыһа” диэн ааттыырга көрдөһүү сурук суруйбуттара туолан бүгүн үрдүк таһымҥа арыллыыта буолла.
Ол курдук, бу күн Далыр нэһилиэгэр Үөһээ Бүлүүтээҕи Доруобуйа харыстабылын кылаабынай бырааһа С.Н. Павлова уонна Наталья Васильевна оҕолоро Александр, Ольга Ксенофонтовтар, Валерий, Раиса Семеновтар уонна Сергей, Валентина Ксенофонтовтар кэлэн күндү ыалдьыт буоллулар. Элбэх эҕэрдэ тыллар, баҕа санаа бастыҥнара этилиннилэр.
Биллэн турар биһиги балыыһабыт сүүстэн тахса сыллаах үлэтин устуоруйатыгар үгүс үрүҥ халааттаах, өрүһүйэр аналлаах дьон үлэлээн аастахтара, үлэлииллэр, өссө да үлэлиэхтэрэ турдаҕа.
«Сирдээҕи Аанньал» диэн бар дьонун махталынан ааттаммыт, 12 оҕо күн күбэй ийэтэ Кривогорницына Наталья Васильевна биһиги ортобутугар төһө да суоҕун иһин, олох салҕанар, күн дьыл хотоҕостуу субуллар, көлүөнэни көлүөнэ солбуйар, сэттэ үйэ тухары сэһэргии-кэпсии турдуннар, Наталья Васильевна Кривогорницына сырдык аата аҕыс үйэ тухары айгыраабат аналланнын, тоҕус үйэ тухары тостубат тосхоллоннун! Билигин Наталья Васильевна олорбут кылгас, чаҕылхай олоҕо биһиэхэ оҕолоругар, сиэннэригэр, хос сиэннэригэр киэн туттуу, олох бастыҥ оскуолата буолан иннибитигэр сырдыыр.
