Бүгүн, ыам ыйын 26 күнүгэр, күнүс 4 чааска Бүтүн Россиятааҕы “БИБЛИОКҮН 2023” тэрээһин иһинэн Бүтүн Россиятааҕы “Кинигэ күүһэ” акция ыытылынна. Акцияҕа Далыр бочуоттаах олохтооҕо, СР култууратын туйгуна, култуура бочуоттаах бэтэрээнэ, өр сылларга олохтоох библиотекаҕа үлэлээбит Ефросиния Егоровна Софронова ыалдьыттаата.
Акцияҕа Далыр орто оскуолатын 1 кылаастара уонна оҕо уһуйаанын иитиллээччилэрэ кыттыыны ыллылар. Ефросиния Егоровна оҕолорго остуоруйа кэпсээтэ, оҕолор олус интэриэһиргээн, болҕойон олорон иһиттилэр, сэргээтилэр уонна остуоруйа ис хоһоонун ырыттылар.
Кинигэ хайдах курдук күүстээҕин, туһалааҕын, интэриэһинэйин туһунан кэпсээтэ. Ону тэҥэ БИБЛИОТЕКА туһунан кылгас, үөрэтэр мультфильмнары көрдүбүт уонна түмүккэ оҕолорго, кэлбит ыалдьыттарга “Бырааһынньыктааҕы торт” күндүлээтибит.
“Кинигэ күүһэ” акция олус интэриэһинэйдик, истиҥник ааспытыгар күндү ыалдьыппытыгар Ефросиния Егоровнаҕа, оҕолорго уонна ыалдьыттарга махталбын тиэрдэбин.
Барыта 26 киһи кыттыыны ылла, ол иһигэр 22 оҕо.