Бүгүн, о.э. бэс ыйын 21 күнүгэр Далыр олохтоох бибилэтиэкэтигэр Далыр нэһилиэгиттэн төрүттээх, биир дойдулаахпыт, “АЛРОСА” хампаанньа бэтэрээнэ, бэйэтин кэмигэр социалистическай күрэхтэһии кыайыылааҕа, рационализатор, 33 сыл хайаны байытар кэмбинээккэ үһүс баабырыкаҕа үлэлээбит Иннокентий Сергеевич Тарасов сырдык аатыгар анаммыт “Ааспыты, буолбуту анааран…” ахтыылар, ыстатыйалар кинигэ сүрэхтэниитэ буолла.

Бу үс түһүмэхтээх кинигэҕэ АЛРОСА хампаанньа бэтэрээнэ Иннокентий Сергеевич, киһи олус таттаран олорон ааҕар, тус бэйэтин ахтыылара уонна кини кэргэнин, оҕолорун, күтүөтүн, бииргэ төрөөбүттэрин, кылааһынньыктарын, күлүм гынан ааспыт олоҕор, чугастык алтыспыт доҕотторун истиҥ иһирэх ахтыылара киирбиттэр. Кинигэни хомуйан оҥордо олоҕун аргыһа, тапталлаах кэргэнэ Тарасова Анна Николаевна, компьютерга таҥна уонна эрэдээктэрдээтэ Лонкунова Августина Яковлевна.

Иннокентий Сергеевич кэргэнэ, бииргэ төрөөбүттэрэ, бииргэ үөрэммит кылааһынньыктара уонна бииргэ үөскээбит доҕотторо олус истиҥник ахтан-санаан аастылар.

Кинигэ ааптара Анна Николаевна Далыр олохтоох библиотекатыгар 10тан тахса кинигэ бэлэх уунна уонна Далыр орто оскуолатыгар Иннокентий Сергеевич муспут 50-тан тахса “Самолет” коллекциятын бэлэх биэрдэ.

Кинигэ сүрэхтэниитэ олус истиҥник, иһирэхтик ааста. Элбэх ахтыы, махтал тыллар этилиннилэр.